Tamedyazt n Belqasem Ihidjaten

UFRIN n BELQASEM IHIGATEN

2010-06-27T05:29:00.000-07:00

Ufrin 02.

2010-06-25T18:02:00.000-07:00

Ufrin 01

2010-06-25T18:01:00.000-07:00

Asegres

2008-01-05T08:32:00.001-08:00

Tassemt

Yal wa itteṣṣeṛ wayeḍ

Wamma lehlak-is tessnem-t

Yeqqen wegraw s asuṭṭeḍ

Am yir aglaf γer tamemt

Tamurt tezga tessaweḍ

Mmi-s yettṛaǧu tassemt

Alluy γef tuyat d rrkeḍ

Ferset agdud ma teẓẓmem-t.

Acekkal

Semmal igemmu wallaγ

Tettikεic teγzi n yiles

Werǧin rrṣaṣ i d-yeffeγ

Acekkal mazal yekkes

Azegza ma iban werraγ

Seg ^uẓar-is i d-yesseγres

S kra n wi yesnuzun yettaγ

Tameddit leḥsab γur-s...

Aẓar

Yal aẓar iga ttejṛa

Tettaǧǧa-d ifurkawen

Yal afurk ma yell^a yegma

Yimγur ad yeg afriwen

Yal ifer ma yell^a yelha

Yeffer lḥebb ilulen

Am tmaziγt taqsiḍt-a

Turez γer lxedma n yiwen.

Asegres

Newwi-d abrid d aseγres

Γer deffir teddel tmuγli

Tewweḍ tfidi s iγes

Γef wayen i nebda tikli

Nenna aγbel ad t-nekkes

Nebeed maca ad d-nettmekti

Negla-d yeččur usegres

Deg wallaγ i d-tedda tekti

Lumerṭa

Win yerẓan tamurt ass-a

D wid yeẓran ssumen

Tasusmi telha i tuṣṣra

D lqanun ⁿ imakaren

Di ṭṭalyan d lumerṭa

Di Lezzayer d imeqqranen

Yiw^en wass ad tdewweṛ ṛṛuda

Ad xellṣen warraw-nsen

Aḥiwec

2008-01-05T08:31:00.002-08:00

Inig

Wⁱ immuten ahat yeṛtaḥ

Wⁱ iddren ibedd am tili

Tawwurt iγzel lmeftaḥ

Ur yezmir yiwen ad tt-yelli

D irgazen i itekksen leṛwaḥ

Deg ^uzal lεebd yettwali

Wⁱ inudan ssebba i ṛṛwaḥ

Nnig tagi ur telli

Si lǧiha-w uṛǧiγ ssmaḥ

Seg wid εzizen irkelli

Ad inigeγ ul yejreḥ

Wala timedlin fell-i

Wi cqa!

Ur as-qqar i lhemm ṛwiγ

Imir γur-k ad d-yestufu

Aql-iyi ^deg-i la ttwaliγ

Ha-t-ah icab uqerru

Tamsalt weṛεad i tt-friγ

Tis snat fell-as ad d-^ternu

D aseεlaq i teⁿt-senniγ

Yal ta ^di tayeḍ tettṛaǧu

Ad ǧǧeγ ugur, dayen εyiγ

Wⁱ iṭṭfen kra ad as-d-yebru

Imeṭṭi

Win yettrun mebla leḥya

Leḥzen iban γef wudem-is

Ayen i d-yeddan di tmeqwa

D ifiḍ[1] izaden i lqis-is

Am micki tewwet lehwa

Akal mi yeṛwa,

Ttgellilen waman-is

Neγ mi feggḍeⁿt tliwa

ḥemmlent tregwa

Yal wa ay yezmer wul-is

Taγzalt

Iga Yillew di ccan-is

Yettban leεtab-is

Ur yeǧǧi lḥaǧa ad txaṣṣ

Tawenza tuγal s idis

Iwzen[2] uḍar-is

Tamuγli tecba di rrṣaṣ

^Γef i tεedda yewcem afus-is

Ad yecfu ^γef udem-is

Meεduṛ wⁱ iselben fell-as

Gma

Mi tṣubbeḍ bγiγ ad d-^taliḍ

M^a ur d-^tuliḍ γur-k ad n-ṣubbeγ

Mi d-^tuliḍ ma yella ur teγliḍ

Ad k-ttṛaǧuγ ad k-deggreγ

Ma deggreγ-k keč ur teγliḍ

D taqellaεt ara ak-geγ

Ma deggreγ-k ladγa teγliḍ

Ccah! rniγ-k, ad ak-kemmleγ

[1]

ifiḍ : iẓẓan imenza n ṭṭufan neγ aγersiw itettḍen.

[2] iwzen : yeččuṛ, yeḍbeε, yebren uḍar.

Seg wawal γer wayeḍ

2008-01-05T08:31:00.001-08:00

Menyif

Menyif taekemt γef tuyat

Wala ul yezgan yeččuṛ

Menyif taqawajt tekkat

Wamma ^γef ^umeẓẓuγ yir lehduṛ

Menyif ajṛad ma yečča-t

Wala amgud ma yeqqur

Menyif inig ma yura-t

Wamma tudert ddaw leeruṛ

Tamussna

Teweeṛ tmussna i tussna

W’ur nuriw werǧin yenki

Yeweeṛ yisem n tirrugza

Yeshel γef win ur nelli

Adrar yettban d taγezza

I wemdan werǧin nuli

D acu-t wennar di ṣṣeḥra

I win yeẓẓlen di tili

Tissegnay

Seg ^usennan γer tmellalt

Seg tmellalt γer tyaziṭ

Lemtel-a medden akk slant

Ahat ula d kečč teẓriḍ-ṭ

D ddud i tsegnay ma snant

I win iwumi tεedda tiṭ

Lbaṭel yebda walan-t

Ass-a yeggra-d tetteiciḍ-t

Aqḍae

D tayri-nni ^γef nedderγel

Ay neḍfer nugi ad tt-neqḍee

D temẓi nsukk s idikel

Ay neǧǧa tugi ad d-teqḍee

D ayen nugad ^γef i nerwel

Ay nufa deg widak neqḍee

Yemxallaf beṛṛa γef daxel

Yezga wul deg ^umqelae

Tamusta n isefra

2008-01-05T08:29:00.000-08:00

Ala

Ttif wⁱ ifuden ur yeswi

Wala wⁱ iṛwan di lmejṛa

Ttif argaz ur nelli

Wala win tga tmara

Ttif inig i yiri

Wala tamεict di lmerta

Ttif lḥebs tilelli

^Γef wⁱ ur nezmir ad yini “ala !”

ḥafi

Neffeγ tamurt s tsusmi

Xas ma d lεib tarewla

Tewwi-d ad neddu ḥafi

Neffer tirkiḍt n lǧeṛṛa

Nugad fell-aγ ad d-yezzi

Wemrar i temgerḍt la ḥya

Γer deffir tedda tmuγli

Tili m^a ur d-tbiε ara

Newweḍ almi nuggad lewhi

S lxuf i d-teǧǧa tmara

Nnhati

Tella lmut yugaren lmut

D lmut i d-^teǧǧa tsusmi

Yeṛtaḥ wergaz ma yemmut

Wala wⁱ iggaren nnhati

Deg ^ugerjum yugar ṣṣut

Deg wul ay tedder tiγri

Ma yenna-d yugad lmut

Yeglu s uẓar d tirni

Adfel d llufan

Yewwet wedfel d amellal

Ammus ur yuklal

Yecbeḥ wudem-is i tmuγli

D llufan mⁱ ara d-ilal

Zeddig d aderγal

Ul-is d ddheb ur nefni

Tudert tettbeddil leḥwal

Wa ad as-izid wawal

Wayeḍ d dderz ⁿ tikli

Belqasem Ihiğaten

2007-11-19T06:31:00.000-08:00

Inna-yas dda Lmulud: taγerma umaziγ d taγerma n wawal. Awal-a yeččur d inumak. Acku si zik d awal i izgan iferru timsal gar-aneγ. Awal-a neqqar-as: taqbaylit. U ur neqqar γef yiwen yessen "taqbaylit" alamma kan awal-is iferru tent. Anagar imγaren d imusnawen-nneγ, ala imedyazen is isnen i wAwal-a tikli.
Di tama, Belqasem deg wawal-is; di tamawt i iger γef tudert, γef uγilif, γef iẓuran deg Uḥiwec, irefed-it s tewzel. Imi ula d awal awezlan izmer i tlufa γezzifen, muqwren. U ur isluf i yiwen, imi tamuγli-s ur tezri ara di tγanimt. Issefra-d γef temsal akw I teccweγben akken itent iwala. War akukru war tugdi. Acku s ubrid-a kan id-yettara wawal tissas.
Di tama nniḍen, Belqasem, ur yekni ara I tesnaraft n tmeγrut yesseknan acḥal d amedyaz amaziγ, yerran azaglu I wat wawal. Di ṭaqa isefra-s, awal amerḍal yella-d kan anda d-yezga, anda ilaq. D awal amziγ I izwaren imi ala netta i izemren ad yessefru tikti umaziγ s tezdeg, ad yerfed tamuγli umaziγ s tefses.
Di tagara ad inniγ d akken Belqasem d amedyaz yegzan amek teddunt temsal. D amedyaz isnen i "teqbaylit" tikli u ar aγ iγul ara s tegzi-s d tirmitin-is. Tannemirt ay amedyaz u afud igerzen.

Sγur Mack At Udiε

Belqasem Iḥiǧaten:Seg wawal γer wayeḍ.

2007-11-19T06:24:00.000-08:00

Seg wawal ar wayeḍ, seg yimi ar wayeḍ is inesla s tufγa n tmedyazt, I tikkelt nniḍen, n Belqasem Iḥiǧaten : Seg wawal γer wayeḍ.

Seld Aḥiwec, I γef d-newwi awal yagi, atan yewweḍ-d ar gar ifassen nneγ : Seg wawal γar wayeḍ u atnan diγen wiyaḍ ar ttraǧun di tezrigin nnuba nsen :

- tamustat n isefra
- asegres
- aẓeṭṭa n tessist
- iṭij asemmaḍ
- amesbrid

Tigi yakw a nuγal ad tent nγar u ad nawwi diγen awal fell-asent, awal ar a uklalent. Ma deg wagi, Seg wawal γar wayeḍ, idda umedyaz deg ubrid id-inǧar deg Uḥiwec. S yiwen wawal : isefra iwezlanen, inumak iγwezfanen. Akka I yetti wawal deg-s u myal asefru ismektayaγ-d d umedyaz nneγ ameqwran : Si Muḥ Umḥand. Maca, ayen I deg mgaraden, d taγawsa n wakud. Belqasem d amedyaz atrar u tilufa ticweγen, timsal d-irsen ar gar wallen-is d tid n wassa. Si Muḥ iḍ-li, Belqasem assa u myal yiwen idda di tallit-is.
Ger timsal timiranin dγa it-iqebṛen tella tin n tira am akka aγ t-id inna deg usefru umi isemma Tira.

Tira

Diri-tt tittin n laṣel
Aserdun inkaṛ baba-s

Ɣur-neγ tira tfeṣṣel
D tamaziγt ay aγilas

Ma d win i k-yennan beddel
Am nekk uγal ini-yas

Ma yugi ḥseb-it yennṣel
Yal wa ad yesselmed tarwa-s

Ulac taluft akw ittemlili umdan di tudart-is imi yunef umedyaz. Ulac tawaγit d-yuγen γef ugdud nneγ, neγ γef igduden umaḍal d tirni ittwaknan imi ur yefki ara azal. Seg Udayen almi di Izanditen n Marikan erra yasen akw tajmilt uklalen. Izanditen d tuksa isen tettwakkes tmurt nsen is ifkan anzi γur neγ. Tawaγit I deg ddren, yir tudart iten iččan, yir tamuγli is iten ttwalin medden di tmurt iten id-iǧǧan, ur tettaǧa Amaziγ uzal. Assa, xas tadamsa n Kanada tufa iman-is, Izanditen, aẓar n tmurt, iṣaḥ iten-id, akken is inna Belqasem “uznunu n dexxan”.

Izanditen

Nniγ-as di Lzzayer kan
Am Leqbayel I gan
Igduden s yisem yekkes

Ziγ msefhamen lḥekkam
Ay akken akk llan
Ay ul ameγbun ayes

Izanditen n Marikan
Znuzun dexxan
Ma d tamurt wi bγan ines

Ayen diγen iyi ǧan qqareγ di tmedyazt ines s tmuγli nniḍen d abrid is it-ttwasenna. Acku d abrid amaynut. D abrid imgaraden s waṭas γef win d-nǧer si zik tmedyazt tazwawt. D win ur nennum. Imi ta, zik tella telha kan d tγawsiwin n tudart n myal ass d iγweblan-is am: tayri, laẓ, nger, iγurar, ttṛad, imenγi, timegraḍ, atg. Belqasem s Seg wawal γar wayeḍ issali aswir n tmedayzt imi yebra I waṭas n wuguren, isensser mači d kra n tecḍaḍ d-rran tili γef kra imedyazen nneγ. Isefra-s neflen γef tlisa n tmurt, γef tid n taddart, γef tid n udrum, γef tid n uxxam. Kecmen ar wayla n umdan, kecmen deg umdan s timad-is. Zren di temda n talsa u skeflen-d ayen ifren. Zegren ar wannar agraγlan. Am Uγiwel, d asefru id-ifkan tamuγli ubujad ar tudart, winna akken iγilen tudart d “aγiwel”

Aγiwel

Ayen I d-nniγ aql-i da
Win islan lekdeb iqabel

Win ur nessin uzzu n tasa
Isteqsi medden, imuqel

Deg udem ad d-tban ccama
Win isnen as tt-yeɛqel

Ma d win ur tefni ccada
Yini-as ddunit d aγiwel

Tella tayeḍ diγen: taluft n tira. Zik tamedyazt tazwawt tella kan s yimi, s yiles. Amedyaz ad yenni u win icfan icfa mawellic tarbut tekkes u d aya I γef iγ ruḥen mači d kra isefra, n tmucuha. Ula d ayen izrin γef iqwerray nneγ di tikli Umezruy nneγ tewwet-iten tatut yir tiyita. Nezga nerǧa deg wiyaḍ ad arun akken a necfu. Tasekla nneγ tṛuḥ akw d awal alami nniqal semman-as Tawalt mači Tasekla! U ass-a aṭas iγ iγilen d agdud war-idles, d agdud n teẓgi acku ayen ur nettwaru ittwattu u ayen ittwattun d ayen ur d-nelli. Maca s tikli yagi d-idda Belqasem d kra imedyazen yukwin d nda mi tekkat am netta, s ya d afella tamedyazt nneγ ad tt-id afen ineggura u ad afen deg-s tikli n tudart nneγ n wassa, asirem nneγ, tugdi nneγ, amenni nneγ, atg.
U deg anect-a ala asebγes kan ar nessebγes deg imyura nneγ, deg imedyazen nneγ imi yis-sen kan ar a tidir tutlayt nneγ, ar a tenarni u ar yafken tafat I idles nneγ s umata.

U wid iḥemlen ihi tamedyazt seg ul, wid ibγan amaynut, wid ibγan isefra akken nniḍen asen inniγ: di Seg wawal ar wayeḍ ad tafem ayen I γef tettnadim, ayen ar awen iččaṛen allen. U ad tafem tamedyazt-a:

Di tmurt:
di tsedlisin n Tizi-wezzu, n Freḥa, Iɛeẓẓugen neγ arut I: yidslim@yahoo.fr

Di Fṛansa:
arut I: atmust@yahoo.fr

Di Muntryal:
ar El-Bahdja (musique maghrebine) 3387, rue Jean-Talon Est

Win ibγan diγen ad yenni kra, neγ ad ifek tamuγli-s I umedyaz izmer ad as yaru ar tansiwin-a tiliktṛunin ines:

b_ouidja@hotmail.com
b_ouidja@yahoo.fr

sγur Mack At Udiɛ

Asegres n Belqasem Ihiǧaten

2007-11-19T06:23:00.000-08:00

Win iḍefren abrid n umezruy n talsa s umata a t yaf iččuṛ d imennuγen γef tlelli d yiseγ n igduden. Ad yaf diγen anect-a s kra n wanida idda. Kra n igduden issawḍen, ama s teγremt nsen iǧuǧǧgen ama s tigwuγyelt (tikli am uγyul), irekkḍen wiyaḍ, irekkḍen igduden imectaḥ neγ igduden ur nessaweḍ ara ad rren acengu γef tewwura nsen. Teḍra-d ihi am tmerna n tfunast : win irnan wayeḍ idda deg-s!

Mmeslayeγ γef wanect-a d yiwen umeddakel-iw d afilusuf, inna-yi di temsal-agi ger igduden ulac i illan iffeγ i tilas n way-en tessen talsa d way-en tettidir. Mi as sliγ ittmeslay-ed am wakk-en acemma ur d-iḍri, ḍefreγ-t deg wawal s usteqsi : “amek akk-a acemma ur d-iḍri, d keč neγ nek ar nettwali di kra n igduden xnunsen deg uballuḍ ur tebγin, amek i tzemreḍ ad teqqimeḍ d ablaḍ sdat wanect-a d ugdud nneγ ixnunes gar-asen?” Dγa iḍsatt-id... taḍsa-nni n win issnen kra sdat n win ur nessin tigert! Maca ameddakel mačči d asider i ibγa d issider deg-i, ibγa kan ad yi d-ifk tikta-s s cwiṭ n zzux, imi nella nettmeslay γef ay-en illan d annar n tmussni ines. Dγa inna-d :
- Ur lliγ ara d ablaḍ maca isefk a nwali timsal s tmuγli qessiḥen akken a d-nesbin deg-sent ay-en illan. Yerna asentel agi mačči d win wezzilen, maca s umata tiririt i temsal-a n kra igduden ittuɛeddan γef wiyiḍ, nezmer a tt-negzu ma nger tamawt i teẓgi.
Nek gezmeγ-as awal din, ar teẓgiiiii...
- Ar teẓgi ih!... wali amek ddren iγersiwen di teẓgi, amek ssuddsen tameddurt nsen ad tegzuḍ taluft. Wid i ten issnen sqecren-d yagi asentel-a; nnan d akk-en iγersiwen bḍan d iderma, γef uqerruy n myal adrum illa bu-tezmert. Ama d ibkan, ama d izmawen, ama d uccanen, ama uccayen. Myal tarbaɛt a tt-tafeḍ tesɛa bu-tezmert issadawen akken i s ihwa timsal. Ger iγersiwen, d bu-tezmert i ten isrusen akken i s ihwa. yak sdat izmawen, uccanen d tarewla kan ara ten isselken! Akk-a diγen i tella tegnitt ger igduden, d bu-tezmert i issadawen timsal, win ur nezmir i yiman-is ad tafeḍ am uccen sdat yizem, issers aqerruy-is issusem. Yerna ma teγriḍ, aγersiw deg waddar (animal urbain) n Conrad Lorenz ad tafeḍ ak timsal-a amek sennant ta γef ta. Ad tafeḍ nekni daγen d iγersiwen isseddawen timsal am di teẓgi, d acu kan nesnerni-tent akken ad banent d tigatin n umdan, nessekcam-ed di myal tagnitt awal n teγremt. Netta di tidett, win irnan wayeḍ idda fell-as!
Ay-en i d-inna akk-a umeddakel-iw isdubbez-iyi. Maca mi nudaγ acemma ufiγ d tidett. Ufiγ akk-en i d-inna i tella si zik ar tura. D acu ay-en i deg temgarad tamsalt attan deg way-en imi amdan mačči kan d aγersiw i illa. Acku ittḥulfu i war-taγdemt, ur issussum, ur ikennu ara i lebda. Amdan ur izmir ara ad innam tiyita d kennu kan akk-a s tefses. Xas ur izmir ara ad yerr tiyita s ufus neγ s ubeckiḍ, ittnadi iberdan n iḍen i s ara yekkes urfan, i s ara d-yerr iseγ i yiman-is acku amdan ur ittaf ara iman-is mi ara d-yaf iman-is am uccen i teqqerqer tyaziḍt!
Ihi amdan d-yufan iman-is deg ugdud i γef yuγal uzaglu izga ittnaγ. Ittnaγ s wawal, s yiles, s umeslay, s udlis.

D ay-a i γef si zik neččuṛ d imedyazen. Negza teffeγ-aγ afus tyita maca akk-en a s nekker i kra i γ yugaren ur nezmir ara, dγa nezga nessefray nettekkes urfan. Deg-neγ tekker tmes, nerγa maca tekkes-aγ-tt tezmert, sakin qqimen-d kan imedyazen ṭṭfen amnaṛ s wawal, s usefru.

Ass-a ur nezmir ara a d-nenni ak imedyazen γef anect-a ittewten. Myal yiwen amek neγ sani inebbeh aciwen-is maca aẓar i deg d-frurin, tara i deg d-ǧǧuǧǧgen attan yiwen-is.

Yiwen seg imedyazen-a iqqimen γef umnaṛ, izgan ittnaγ s wawal d udlis, illa Belqasem Ihiǧaten. Amedyaz-a nessen-it yagi imi newwi-d fell-as awal tikkal izrin. Ass-a a d-nawi awal n iḍen γef umahil-is deg udlis-a wis-4: Asegres.

Ger wid i d-iffγen d wid ara d-iffγen ussan i d-itteddun, llan γer Belqasem 5 yedlisen. Di myal adlis, llan azal n 240 isefra; ay-en i s ifkan kra n 1200 d asefru γef tqerruyt-is.
Isefra-yagi ak n Belqasem zḍan γef waṭas isentilen. I ten ittawin γer temẓi, i ten id-ittarran γer temγer. I ten irefden γer tayri d taḍsa, i ten id-isrusun γer uγucu d imeṭṭi. Xeṛttum isentilen-is i γef isefray d igraγlanen. Di myal yiwen isentaḍ awal d unamek γef ay-en iḍran d ugdud nneγ. Iwwi-d awal, d amedya, γef izanditen n Maya imi inger yedlis nsen syis-sen. Dagi ira ad yini ula d nekwni aql-aγ γef umnaṛ n nnger. Neγ Imuzuten n tmurt n Ccinwa, iddren seg wasmi llan, seg wasmi iẓran tafat, ddaw uḍar Ucinwa, ass-a adlis ur asen iqqim ala kra kan di tawalt.

Di tira, ifka Belqasem azal d umḍiq i wawalen iqburen. Issarem ad ten issider imi γur-sen anamek ur nelli ala deg yedles nneγ, ala di tmuγli nneγ, ala di tmeslayt nneγ, am deg usefru Aḥṛan. Aḥṛan d awal aqbur i d-iskanen udem n win i wumi iqqur uqerruy. D awal i nerra di ṭṭerf. Deg usefru n iḍen daγen i wumi isemma: Ḥebbac-Mamar, iwwi-d awal γef tedyant-nni iḍran deg At Yanni di tallit taqburt.
Ḥebbac-Mamar d yiwen ur γur telli tamart, d yiwen isɛan udem war-anẓaden. Yiwen wass deg At Yanni, yiwen Ḥebbac-Mamar i γef teḍsa taddart-is, isuter di tejmaɛt, i at taddart, kra n wanẓaden. Inna-yasen tettaḍsam fell-i imi ur telli γur-i tamart, maca limer myal yiwen seg-wen ad iyi d-iffek anẓad ad uγaleγ s učamar am kunwi.
Tamsalt-a diγen iwwi-tt-id akken ad isider inumak inattak si zik i kra n tedyanin i d-ttawin medden deg wawal, atan amek i tt id-inna umedyaz s usefru:

Yenna-yas Ḥebbac-Mamar
Kunwi s ičumar
Nek aqdum am lemri
Ala anẓad i d-nessuter
Yal yiwen ad ikker
Ad yili ad ibdu tukci
Ɣer γur-wen mazal isker
Fell-i ad iqqel sser
A d-nemsawat i tmuγli

Belqasem ur issider ara kan awalen iqburen, ismuzzeγ kra n wawalen i d-yussan si tmeslayin tiweṛdanin timti ur ten yufi ara γur-neγ. D amedya deg uḍris 26, ifka izwel i yiwen usefru: Acariban. Acariban d awal i d-yussan seg wawal afṛansis : Chérubin. Neγ acaman, awal d-yusan seg yiwet di tmeslayin Izanditen n Marikan n wadda.

Di tira n tmedyazt iwwi-d daγen amaynut Belqasem. Yufa amek ar iččaṛ tiṭ i win ara iγren isefra yernu ad ibγu a ten-id yini s yiles war ma inuγna win ittgallan s illugan n tira. Akk-en n iḍen, nezmer a d-nini yufa amek isemlal imru d yiles. Issezdi tira d tawalt. Deg way-agi ulac am umedya akken ad ibeggen yiwen abrid-a amaynut i tira n tmedyazt :
Ma yaru umedyaz: γef aya deg usefru-s asekkil “γ” ur iddi deg awal, ittaru-t akk-a : “γef”. S ubrid-a, asekkil “γ” illa maca fiḥel ma iγra-t yiwen akken ad d-isenṭeq asefru akk-en iwata.
Xas ilha, iwata way-en yura win ara t iγren a t id-iγer s tefses. Awal ur iḥlaǧ aseγti imi ur teffiγ ara tira i ilugan n tjeṛṛumt, yernu win ara tt iγren ur as d-ttban ara ẓẓayet imi illa wamek ara tt iγer s tefses. Issali kan asekkil-nni iẓẓayen acemma i yiles ar tama n gma-s : iṭṭef-ed sin yegḍaḍ s yiwet n tqerrict! Deg anect-a ahat ad illin wid ara ilemden abrid-a n tira di tmedyazt, ssarameγ a t ddmen ak imedyazen, a t ssexdamen.

Belqasem xas akk-a issaweḍ issufeγ-d semmus n yedlisen ur as kfin ara wawalen d tikta. Ussan-a i d-iteddun a d-issufeγ wayeḍ imi iqqar : Azeṭṭa n tissist. Amedyaz-agi nneγ a d-iqqim d amedya ak i wid ittargun ad arun, a d-ssufγen s tmeslayt nsen xas ulac allalen acku ula d netta d tafenṭazit kan d tinzar, d tebγest d ucayaḍ icaḍ wul γef tsekla i t irran d win id-issufγen akw aṭas n idlisen s tezwawat.
Meskud ak tturugent tikta, meskud ur teqqur ur tluγ tala, ad teddu tsekla ar sdat.

M.A.U.

Tamusta n isefra sγur Belqasem Iḥiǧaten

2007-11-19T06:21:00.000-08:00

Tamusta n isefra d adlis wis qrad n Belqasem Iḥiǧaten id-ifγen di ctember izrin di tmurt. Wisen d tahregt neγ d aneγmes, maca amedyaz agi nneγ ur izmir ad yanef I wayen I t-icweγben deg ul-is. Yufa amek ar aγ d-ittak tikktiwin ines. Igza d akken tallit tbeddel u wid ittaken zik tameẓẓuγt I imedyazen assa ulac-iten. Assa s udlis kan ar issiweḍ umedyaz awal-is, tikti-s, tamuγli-s, addad-is I wiyaḍ.Asefru mačči d awalen kan ittemseḍfaren am akken amedyaz mačči kan d win isnen a ten isenni. Asefru iseqraḥ, isefraḥ, isnecraḥ, ittawi yaγ γef ubrid uxemmem. Asefru ittaǧǧa yagh nbat, neldi imi nessusem. Tikwal neqqar as amek I izmer umdan ad yini anect-a s tkemmict n wawalen, amek I issawaḍ ad ifek I wiyaḍ izen ines u ad tegzun xas ur ten issin ur t sinen. Maca win igren tamawt, deffir myal tikwemmict n wawalen ittwasennan akken I wulem illa lqerḥ, uneγni, urrif, tumert. D aya iyi djan qqareγ-as asefru d udem umedyaz war talaba. Asefru d amedyaz ḥenturi, akken I t-is ureb yemma-s.

Neqqar tikwal γef kra imedyazen nneγ d akken ur ten nessin ara imi ur d-ttmeslayen ara I medden srid am isartalen, neqqar fell-asen ẓewren negh ɛugnen imi ur neẓri ara amek igan di tudert nsen, maca netta anect-a yakw d awalen kan. Acku win iγran asefru n umedyaz isefk ad yessin amedyaz-a acku asefru d mmi-s n umedyaz, neγ d tamaḍt deg-s, d inec, d iccer.
Belqasem daγen ur imgarad-ara γef imedyazen niḍen, kra m wayen I γef ters tiṭ, I γef tezza tasa-s, I γef iwwet ul-is, ifka-aγ-d fell-as tamuγli-s.

Sγur Mack at Udiɛ

Ayγer
Ayγer macci d Yugurten
Neγ d Masensen
Di tedrimt udem ad d-yeffeγ

Yak ula d nutni nnuγen
Ṛṛum tessen-iten
Widak I d lejdud nneγ

ɛabdelqader yif-iten
Acku netta nsen
A wid ur yezdiγ wallaγ

Tizizwa
Ffγent tzizwa taγrast
ǧǧant taɛessast
D aglaf n yizan tezzin

D acnaf I iregmen tarnast
Uγen talemmast
Iḍebbalen γer tlawin

Udem ur tektal terdast
Yedda di texnanast
Ggulen argaz ur yeqqim

Aslugi
W ur nezmir ad yerr tili
Yeddu yeddari
Deg yifer n sidi-s yufa-t

Ad ihedder yettleγwi
Yettnadi s yeẓri
Ma ibedd uḍad iwala-t

Yeγleb aqjun-aslugi
Weqbel ad as-yini
D gma-s neγ bab-is yeɛna-t

Tadiwennit d Belqasem Iḥiǧǧaten neɣ d Simenon n tmedyazt taqbaylit

2007-11-19T06:17:00.000-08:00

Imyura: D acu-t Belqasem amedyaz d Belqasem amdan?

Belqasem: Tamezwarut nek ur rriγ ara iman-iw d amedyaz, xas sfedwiceγ di tmedyazt, acku awal-a umedyaz γur-s anamek meqqwer, γur neγ nekni s at zik.
Yerna ufiγ illa wayen yessekf a t-id-nnini maca yiwen ur t-id-inni. Ihi nek bγiγ a t-id-inniγ I wakken ad ccareγ ilem. Amedya tizmamin akw I d-iffγen uran-t akw γef tayri, maca nek macci ur ẓriγ ara ayen ara d-inniγ γef tayri. Maca illa wayen yettwattun γef usentel-a, akka I teḍra akk d isentilen nniḍen, ama d tasertit ama d iγweblan ama γef tudert s umata.

Imyura: I kecc tenniḍ-ten-id?
Belqasem: Akken ttwaliγ, bγiγ ad d-inniγ ayen ur d-nnin ara yagi.

Imyura: Imi ur terriḍ ara iman-ik d amedyaz, amek illa deg-k Belqasem amdan?
Belqasem: D acu ara k-iniγ! Tamedyazt macci ass-a I tt-bdiγ, zik ncennu s tbewwaḍin n zzit, deg isseggwasen 1967-1968. Deg unebdu n 1968, ttakwreγ I gma snitra u bdiγ cennuγ Ccrif Xeddam. Imiren I imlal Belqasem, amdan d umedyaz d-yukwin deg-s.

Imyura: I wass-a?
Belqasem: Ass-a d akemmel n iḍelli. Lγerba, uguren n tudert wwin aγ ar wanda nniḍen. Tbeddel tudert, nbeddel yid-s. Zik riγ isefra n wiyaḍ, ass-a riγ a d-inniγ nek s timmad-iw ayen ẓriγ d wayen I wumi ḥulfaγ.

Imyura: Ulac ihi amedyaz d umdan izedγen deg-k?
Belqasem: Ugaγ amedyaz akw d umdan mgaraden. Amedyaz d amdan myal ass, maca d amedyaz di kra n tiram kan, ur issefraw ara si tafrara ar yiḍ. Amedya zemreγ ad bduγ asefru ass-a uma ur tekkfiγ, azekka ur ttizmireγ ara a t-kfuγ

Imyura : I tmedyazt, d tikti neγ d afra (sentiment)?
Belqasem: Ugaγ d afra. Ayen imi qqareγ tafekka usefru tusa-d seg unelli n umedyaz “âme du poète” . Dacu, akken ad ifak usefru u ad d-izeg akken iwata tlaq tikti.
Asefru ihi macci d tikti di tazwara. Afra d usugen (imagination) ttasen-d iman-nnsen. Syin d tiktiwin a ten-irren d asefru.

Imyura: Anwa Imedyazen I teqqareḍ?
Belqasem: Tagi steqsan iyi-d fell-as yagi u nniγ-asen zik ulac aṭas imedyazen nneγ am Yusef Uqaci, neγ iqburen nniḍen, ila-d kan si Muḥend u Mḥend ittwassen. Ass-a, win a k-yinin ikcem γer unnar n tmedyazt send Si Muḥ u Mḥend, ur as ssel ara. Acku γef isefra-s I d-tella tira tamezwarut d-yuγen γef tmedyazt nneγ. Maca tella daγen tezlitt ilaq ad-nawi awal fell-as, acku tella-d akw ar madden. D nettat ar ak yawin ar tmedyazt. Ma d ass-a llan idlisen n tmedyazt u wid-tt-iqqaren akw ḥemlen ad slen I tezlatin, si Muḥend u Mḥend γriγ-t akw di tmurt, γriγ daγen Beaudelaire, Rmbaud, Verlaine, la fontaine, Apolinaire Guillaume. Dagi di Kanada γriγ Emil Neligan, Gilles Vignault. Ladγa ssuqlaγ-d yiwen usefru n Gilles Vignault id-iddan deg Seg wawal ar wayeḍ.

Imyura: Imi teγriḍ akw imedyazen agi u imi tessneḍ tamedyazt nneγ, deg wacu imgaradent?
Belqasem: Magaradent deg yiwet. Di tektiwin timeqwranin. Mgaradent deg akken timeslayin nniḍen γur sent awalen s wayes imedyazen ufan s wacu I sebrurzen tiktiwin nnsen. Nekwni neccur d uguren deg wannar-a. Tikwal bγiγ ad ssuqleγ kra isefra si tefransist maca m’ar a awḍeγ γer kra n wawalen irefden kra n tektiwin ur ttafeγ ara amek ara t-id-ssuqleγ war ma kkseγ as anamek is amenzu I usefru.

Imyura: Amek I k-id-tusa tikti a taruḍ isefra-k u a ten-id tessufγeḍ ?
Belqasem: Ulac γur-i afran. Ẓriγ iman-iw ur s-zmireγ ara I tira nniḍen, d tamedyazt I wumi sneγ tikli imi uγeγ yagi tanumi ttaruγ isefra. Ma d ungalen ur asen zmireγ ara (taḍsa).

Imyura: Tebγiḍ ad taruḍ ungalen?
Belqasem: Bγiγ ad aruγ maca ilaq ad afeγ amek, ansa ar as kkeγ!

Imyura: B acu-t wugur I k-iṭṭfen?
Belqasem: Macci d ugur iyi ṭṭfen. Tira n wungal tehwaǧ tiziḍert (ssber). Asebrurez n tikti s wungal d wamek nnumeγ ttaruγ ma d-t-as tikti d tahregt (inspiration) imi s ubrid awezlan I tent-ttaraγ γer lkaγeḍ ur d-zgint ara γef yiwen udem, yiwet wezzilet, tayeḍ γwezzifet.

Imyura: Tura tessufγeḍ-d sin idlisen, u sin wagguren ar zdat ad d-ffγen sin nniḍen, nezmer ad d-nnini d kecc I d Simenon nneγ n tmedyazt?
Belqasem: Ur sawḍeγ ara γer Simenon (taḍsa). Dagi di Muntryal llan wid yuran 10 ar 20 n idlisen, qqareγ as ulac tilisa di tsekla, ma d Simenon issali tancirt γef sawen anda ur as nessawaḍ. U aqli ass-a ur as sawḍeγ ara, yerna netta yettaru idlisen-is s yiwet n tyita u nekki am akken id-nenna zgellin-a deg-i izdeγ umedyaz d umdan, yiwen ifka-tt akkin wayeḍ ikfa-tt akka (taḍsa).

Imyura: Isefra-k xas lhan, gerzen, deg-sen awalen n taɛrabt, u xussent di tenfaliyin n teqbaylit?
Belqasem: Ad bduγ di tis-snat: tinfaliyin n teqbayli llant deg isefra-w, ma d awal n taɛrabt, ahat d tidett lan kra yif-it limer I sen-beddleγ s wawalen nniḍen ama d iqburen ama d atraren, u maca nek imi akken I d-tusa tikti a tt-aruγ akken, tikwal tettas-d sennig ubrid tikwal tettas-d ddaw ubrid. Yerna anda ilaq ad kkeseγ awalen n taɛrabt, d awalen imaynuten, atraren ar a rreγ deg imukan nnsen u ma xedmeγ akken aṭas iberdan ad d-ffγen isefra ulac win ar a ten-igzun war amawal, acku aṭas n wawalen I d-ittnulfun u ur kcimen ara akken iwulem di tmeslayt n myal ass akken a d-asen d imezwura γer uqerruy-iw.

Imyura: Amek ik-d ttbanen wawalen-a I d-ittnulfun?
Belqasem: D ayen ilhan. Cfiγ assmi d-iffeγ wawal azul d kra kan I t-iqqaren u ass-a yuγ u izga deg imawen d tirni.

Imyura: Macci d amahil umedyaz azenzew (diffusion) n wawalen-a I d-ittnulfun?
Belqasem: Ih! D tidett!! Icennayen daγen ilaq ad d-fken afus deg wanecta.

Imyura: Ayen ihi ulac aṭas deg isefra-k?
Belaqsem: Ssekcameγ-d yiwen ar sin wawalen imaynuten atraren akken ad ddun d wiyaḍ war ma uγalen d ugur I win ar a iγren tamedyazt-iw.

Imyura: Izmer ad-yili Uqbayli d amedyaz u macci d ameγnas?
Belqasem: Ih, izmer. Yal yiwen γur-s iswi! Llan wid icennun akken ad ccen aγrum u macci d aγnes I γef I ten tuγ.

Imyura: I kecc?
Belqasem: Nek ur zriγ ara! tegra-d I medden s tmuγli nnsen ad walin d acu-t umahil-iw.

Imyura: limer tezmireḍ ad tgeḍ kra I unnar n tsekla n teqbaylit, d acu ar as tgeḍ?
Belqasem: Tezriḍ, llan 8 imelyunen imezdaγ di tmurt n leqbayel u llan 8 imelyunen imezdaγ di tmurt n Québec u llan 2000 n idlisen, 150 n tceqqufin umezgun I d-teffγen I usseggwas dagi. Limer zmireγ I kra yelli ad rreγ tagwnitt taseklant di tmurt nneγ am tin n da.

Imyura: Tessenḍ imyura.com?
Belqaem: Ih! ssneγ-t, amek ih?

Imyura: Amek I t-tufiḍ ?
Belqasem: Ilha, igerrez nezzeh, d kunwi I s-ifkan azal tuklal tmeslayt nneγ deg uzetta Internet, ma tunefem-iyi, a wen inniγ u ad inniγ tanemmirt s nnig tinemmrin I wid akk I ttraun s tmeslayt nneγ d wid isikkiden ar zdat acku illa ayen isɛan azal ugar n umkerrec gar aneγ.

Mack At Udiɛ